НАТО бош котиби Йенс Столтенберг Европа Иттифоқи армияси тузилишидан хавотирда эканини билдирди. Бу ҳақда «The Telegraph» нашрига таяниб, «РИА Новости» хабар берди.

Котибнинг маълум қилишича, бу армиянинг пайдо бўлиши Трансатлантик альянсни заифлаштириши ва Европанинг бўлинишига сабаб бўлиши мумкин. «Мен Европанинг мудофаа соҳасига қўшаётган катта ҳиссасини олқишлайман, лекин уларнинг ҳаракати НАТО ўрнини босмаслиги керак. Шимолий Америка ва Европа ўртасидаги алоқани сақлаб қолиш лозим», — деган у.

Столтенбергнинг сўзларига кўра, Ғарб етарли ресурсларга эга эмас, шунинг учун НАТО эга бўлган функцияларнинг такрорланишига йўл қўймаслик керак. Таъкидланишича, котибнинг бу баёнотига Европа Иттифоқи дипломатияси раҳбари Хосеп Боррель ва ҳарбий қўмита раиси Клаудио Грацианонинг ташкилот ичида камида беш минг кишидан иборат тезкор армияни тузиш таклифи сабаб бўлган.

Аввалроқ Европа Иттифоқи парчаланиши мумкинлиги маълум қилинганди. Шунингдек, Европа Иттифоқининг Афғонистондаги икки мақсади очиқланган.