Ўзбекистонга ўзбек-хитой вакцинасининг яна 1,5 млн дозаси келтирилди
Ўзбекистонга 5 сентябрь куни «ZF-UZ-VAC2001» вакцинасининг яна 1,5 миллион дозаси келтирилди. Бу ҳақда Соғлиқни сақлаш вазирлиги ахборот хизмати хабар қилди.
Маълум бўлишича, бу орқали Ўзбекистонга келтирилган жами вакцина 19 миллион 446 минг 540 дозани ташкил қилган. Улардан:
- 460 000 дозаси «Sputnik V»;
- 986 480 дозаси «AstraZeneca»;
- 15 миллион дозаси «ZF-UZ-VAC2001»;
- 3 миллион 60 дозаси «Moderna» вакцинаси ҳисобланади.
Қайд этилишича, шу кунгача мамлакатда жами 15 миллион 4856 доза вакцинадан фойдаланилган. Тўлиқ эмланган фуқаролар 2 123 460 нафарни ташкил қилади.
Эслатиб ўтамиз, аввалроқ Ўзбекистонга Германиядан коронавирусга қарши юқори самарага эга препарат келтирилгани хабар қилинганди. Шунингдек, Ўзбекистонга ўзбек-хитой вакцинасининг яна 3 миллион дозаси олиб келингани ва Ўзбекистонга 90 минг доза «Спутник V» вакцинаси келтирилгани маълум қилинган.
