Россиялик юқумли касалликлар шифокори Наталья Очинская смартфон юзасидаги бактериялар қандай касалликларга сабаб бўлишини маълум қилди. Бу ҳақда «Известия» хабар берди.

Маълум бўлишича, шифокор бу фикрларни Британиянинг Суррей университети олимларининг тегишли тадқиқотига асосланиб айтган. Тадқиқот доирасида олимлар одамларнинг уяли телефонлари патоген бактериялар кўпаядиган жой эканини исботлаган.

«Тадқиқот доирасида 30 нафар оддий одамнинг телефонлари текширилди. Маълум бўлишича, баъзи ҳолларда смартфон корпусида ҳожатхонадагидан кўра 18 баробар кўпроқ бактерия бўлиши мумкин. Масалан, сальмонелла, стрептококки ва бошқа кўплаб бактериялар телефон юзасида яшаши мумкин», — деган шифокор.

Қайд этилишича, телефон юзасида яшайдиган бактериялар тери ва ичак инфекциялари, пневмония ва менингит каби касалликларга сабаб бўлади. Айтилишича, Очинская кунига камида бир марта телефонларнинг сиртини тозалашни тавсия қилган. Смартфонни тозалашдан олдин уни тармоқдан узиш керак. «Бунинг учун сиз антибактериал салфеткаларни, қўллар учун микробларга қарши воситаларни, сув билан суюлтирилган этил спиртини ишлатишингиз мумкин», — деган шифокор.

Аввалроқ глобал исиш хавфли вирусларни юзага чиқариши мумкинлиги айтилганди. Шунингдек, Бразилияда 50 дан ортиқ одамда организмни ишдан чиқарадиган касаллик аниқланган.