Афғонистоннинг Панжшер вилоятида «Толибон» ҳаракатига қаршилик кўрсатаётган кучлар раҳбари Аҳмад Масъуд вилоятдаги вазият бўйича нутқ сўзлайди. Бу ҳақда «ТАСС» хабар берди.

Қаршилик кучлари вакили Али Маисам Назарийнинг сўзларига кўра, айни пайтда Масъуд хавфсиз жойда бўлиб, вилоятдаги вазият бўйича нутқ сўзлашга тайёрланмоқда. 

Шунингдек, маълум қилинишича, «Толибон» ҳаракатининг Панжшерни эгаллагани ҳам ёлғон маълумотдир. Айни пайтда қаршилик кучлари ҳаракатга қарши жангни давом эттирмоқда.

«‘Толибонʼ ҳаракатининг Панжшерни қўлга олгани ҳақидаги баёноти ёлғон. Биз Афғонистон халқини ҳаракатга қарши адолат ва эркинлик тикланмагунча курашишда давом этишимизга ишонтирамиз”, дейилади қаршилик кучларининг Twitter’даги баёнотида.

Маълумот ўрнида, ҳаракат вакили Забиҳуллоҳ Мужоҳид Афғонистоннинг Панжшер вилояти бутунлай «Толибон» ҳаракати назорати остига ўтганини айтганди.

Унинг сўзларига кўра, қаршилик кучларининг бир қисми жангларда мағлуб бўлган, бошқалари қочиб кетган. Ҳаракат вилоят эгаллангач, аҳолига зулм ўтказмаслигини айтган.

«Душман ёлланма аскарларининг охирги таянч пункти — Панжшер вилояти тўлиқ қўлга киритилди. Сўнгги пайтларда мамлакатда тўлиқ хавфсизликни таъминлаш бўйича саъй-ҳаракатлар ҳам ўз натижасини берди ва Панжшер вилояти Ислом Амирлигининг тўлиқ назоратига ўтди» — дея таъкидлаган «Толибон» ҳаракати матбуот котиби Мужоҳид Twitter’даги саҳифасида.