АҚШ ва Хитой мутахассислари нематод қуртларидаги тадқиқотлари орқали инсон умрини узайтириш технологиясини ишлаб чиқди. Бу ҳақда «Science Focus» хабар берди.

Маълум бўлишича, олимлар қурт генларини мослаштириш орқали уларнинг умрини 5 баробар кўпайтириш усулини аниқлаган. Қуртнинг бу тури Ерда энг кенг тарқалганларидан бири ҳисобланади. Улар ҳайвонлар танасида ҳам, ўсимликларда ҳам учрайди. Айтилишича, қуртлар кўпинча қарилик билан боғлиқ тадқиқотларда ишлатилади, чунки эволюция жараёнида одамлар улардан баъзи генетик занжирларни мерос қилиб олган.

Мутахассисларнинг фикрича, тадқиқот генлар ёрдамида одамларнинг умр кўриш давомийлигини оширишга ёрдам беради. Қайд этилишича, кўпчилик умр кўриш давомийлигини ошириш усулларини ўрганишга қарши, чунки бу Ерда аҳоли сонининг кўпайиши муаммосини янада кучайтиради.

Аввалроқ одамлар XXII асрда ўртача қанча умр кўриши мумкинлиги айтилганди. Шунингдек, олимлар аёлларда эрта ўлимга ишора қилувчи белгини аниқлаган.