Фарғона вилояти Марғилон шаҳрида фуқаронинг депортация қилинганлик ҳолатини базадан чиқариб беришни ваъда қилган шахс ушланди. Бу ҳақда Иқтисодий жиноятларга қарши курашиш департаменти ахборот хизмати хабар берди.

Маълум қилинишича, Бош прокуратура ҳузуридаги департамент ҳамда Давлат хавфсизлик хизматининг шаҳар бўлимлари тезкор тадбир ўтказган. Унда фуқаро Б.И. бошқа бир фуқаронинг Россиядан депортация қилинганлик ҳолатини электрон базадан чиқартириб беришни ваъда қилгани аниқланган.

Қайд этилишича, у бунинг учун 900 доллар олган вақтида ушланган. Ҳолат юзасидан Жиноят кодексининг 168-моддаси (Фирибгарлик) билан жиноят иши қўзғатилиб, тергов ҳаракатлари ўтказилмоқда.

Аввалроқ Фарғонада Россияга авиачипта олиб беришни ваъда қилган эркак қўлга олингани ва Тошкентда фуқароларни Польша ва Кореяга ишга жўнатиш учун пул олганлар ушлангани хабар қилинган.