«Google хариталар» дастурини ўрганаётган мактаб ўқувчиси унда «Ер марказидаги тешик» деб белгиланган ҳудудни аниқлади. Бу ҳақда «Daily Star» хабар берди.

Маълум бўлишича, Рори Чепман исмли бола ўз оиласи билан Мерсисайднинг Ғарбий Кирби шаҳридаги Хилбре оролида сайр қилишни режалаштирган. Кейин у «Google хариталар» тизимида шундай номланган ноодатий ҳудудга дуч келган. Бу ҳудуднинг устида камера белгиси ўрнатилган. «Мен буни илгари ҳеч қачон пайқамаган эдим ва кўрганимда ороллардан бирида улкан тешик қазилган деб ўйладим», — деган Рори бу ҳақда.

Интернет фойдаланувчилари бу белгининг харитада нимани англатишини ҳам тушунишга ҳаракат қилди. Баъзилар ҳазиллашиб, Ернинг марказига кириш жойи борлигини ва бу жойга тушиб кетмаслик учун эҳтиёт бўлиш кераклигини ёзди. Қайд этилишича, бу ҳудуд устидаги мазкур белги ҳозирда олиб ташланган. Хилбре ороллари маҳаллий табиат қўриқхонаси бўлган ва алоҳида илмий қизиқиш уйғотадиган ороллар гуруҳи ҳисобланади.

Аввалроқ Лукашенконинг қароргоҳи бу дастурда «диктаторнинг мулки» деб кўрсатилганди. Шунингдек, олимлар Ерда номаълум ҳудудни аниқлаган.