Покистон разведкаси раҳбари Фаиз Ҳамид Кобулда Абдул Ғани Бародар билан учрашди. Бу ҳақда «Times of India» хабар берди.

Маълум бўлишича, «Толибон» ҳаракати матбуот котиби Забиҳуллоҳ Мужоҳид матбуот анжуманида генерал-лейтенант Фаиз Ҳамид Кобулга ташрифи чоғида ҳаракатнинг сиёсий идораси раҳбари билан учрашганини тасдиқлаган.

Айтилишича, «Толибон» ҳаракати покистонлик амалдорни Исломободни Афғонистон ҳудуди Покистонга қарши ишлатилмаслигига ишонтирган. Ҳаракатнинг маданият ва ахборот бўйича комиссияси бошлиғи ўринбосари Аҳмадуллоҳ Восиқ эса «Толибон» ҳаракати раҳбарлари Ҳамид билан Торкҳам ва Спин-Болдак чегара пунктларида икки томонлама муносабатлар ва афғонларнинг муаммоларини муҳокама қилганини маълум қилган.

«Покистонлик амалдор чегарадош ҳудудларда, айниқса, Торхам ва Спин-Болдакдаги афғонларнинг муаммоларини ҳал қилиш учун келган. Улар унинг Кобулга ташрифини хоҳлашди, биз уни қабул қилдик», — деган Восиқ.

Аввалроқ Покистон ҳукумати «Толибон» ҳаракати лидерларидан бирини қамоқдан озод қилганди. Шунингдек, Покистон ташқи ишлар вазири дунё давлатларига «Толибон» ҳаракати юзасидан мурожаат қилган.