Самарқанд шаҳрида 5 сентябрь куни маст эркак ИИБ ходимларига қаршилик кўрсатиб, жанжал чиқарди. Бу ҳақда вилоят Ички ишлар бошқармаси ахборот хизмати хабар берди.

Маълум бўлишича, воқеа соат 23:45 атрофида шаҳарнинг Гўрўғли кўчасида содир бўлган. Аниқланишича, Д.М. исмли 39 ёшли маст эркак тунги хизматни олиб бораётган ИИБ ҳодимларига бўйсунмай, қаршилик кўрсатган. Шунингдек, у сабабсиз бақир-чақир қилиб, жамиятда ўрнатилган тартиб-қоидаларни менсимай, жанжал кўтарган.

Таъкидланишича, фуқарони яқин орадаги ички ишлар бўлимига олиб бориш давомида эркакнинг яқинлари ҳам қўшилиб, ИИБга тўсқинлик қилган. Мазкур ҳолат қонуний тартибда расмийлаштирилиб, Д.М.га нисбатан Маъмурий жавобгарлик тўғрисидаги кодекснинг тегишли моддалари билан маъмурий баённомалар расмийлаштирилган. Шу билан бирга, фуқаронинг хатти-ҳаракатига нисбатан суд органлари томонидан якуний қарор қабул қилиниши айтилган.

Аввалроқ Сурхондарёда эркак ИИБ ходимига қаршилик кўрсатиб, уни калтаклагани маълум қилинган. Шунингдек, Бухоро шаҳрида хизмат вазифасини бажараётган ИИБ ходимини урган фуқароларга нисбатан жиноят иши очилгани хабар қилинган.