Қашқадарё вилояти Чироқчи туманида блогер машинаси ўғирланганини айтиб, ИИБга ёлғон хабар берди. Бу ҳақда вилоят Ички ишлар бошқармаси ахборот хизмати хабар берди.

Маълум бўлишича, воқеа 1 сентябрь куни соат 02:00 атрофида туманнинг Дам МФЙ ҳудудида содир бўлган. Аниқланишича, ушбу МФЙда яшовчи Х.У. таниши Х.Б. билан келишиб, ўзининг бошқарувидаги машинани уйнинг орқа томонига олиб бориб, очиқ ҳолда қолдирган ва кейин у ИИБга қўнғироқ қилиб, автомобиль ўғирлаб кетилганини айтган. Қайд этилишича, Х.У. блогерлик фаолияти билан шуғулланган.

Фуқаронинг ёлғон хабар бергани бўйича Чироқчи туман ички ишлар органи фаолиятини мувофиқлаштириш бўлими ҳузуридаги тергов бўлими томонидан Х.У ва Х.Б.га нисбатан Жиноят кодексининг 237-моддаси (Ёлғон хабар бериш) 2-қисми «а» ва «б» банди билан жиноят иши қўзғатилиб, қамоқ эҳтиёт чораси қўлланган.

Аввалроқ Сурхондарёда ИИБга ёлғон хабар берган талабага чора кўрилгани хабар қилинган. Шунингдек, Қашқадарёда ЙПХ ходими формасини кийиб, видео олган тиктокерларга чора кўрилгани маълум қилинган.