Россия президенти Владимир Путин ва Беларусь президенти Александр Лукашенко 9 сентябрь куни бўлиб ўтадиган учрашувда қайси масалаларни муҳокама қилиши маълум қилинди. Бу ҳақда Россия президентининг матбуот котиби Дмитрий Песковга таяниб, «РИА Новости» хабар берди.

Песковнинг сўзларига кўра, давлат раҳбарлари кўп йиллар давомида давом этиб келаётган интеграция масалаларини муҳокама қилади.

«Ҳар сафар интеграция жараёнлари президент Путин ва Лукашенко ўртасидаги икки томонлама учарашувда кун тартибининг асосий мавзуларидан бирига айланади. Мен бу сафар ҳам интеграция жараёнлари муҳокама қилинишидан шубҳаланмайман. Лекин президентлар матбуот анжуманида нима дейишларини, келинг, кутамиз», — деган Путиннинг матбуот котиби.

Шунингдек, Песков бу жуда мураккаб ва кўп қиррали жараён бўлиб, кўп йиллар давомида бу бўйича интенсив ишлар олиб борилганини айтган.

«Ҳамма интеграция масалалари бўйича ишлар тезроқ содир бўлишини хоҳлайди, лекин кўпчилик вазиятни ақл билан баҳолайди. Ва бу борада қандайдир ютуқларни сезмаслик мантиқсиз бўларди», — дея қўшимча қилган у.

Аввалроқ Лукашенко Беларусь Россия таркибига кирадими деган саволга жавоб берганди. Шунингдек, Лукашенко қачон президентликдан кетишини айтганди.