Олимлар дунё саломатлик тизими учун энг катта хавф глобал исиш эканини маълум қилди. Бу ҳақда «The Lancet» хабар берди.

Маълум бўлишича, жаҳоннинг 220 дан ортиқ тиббиёт журналларининг муҳаррирлари қўшма баёнот чиқариб, дунё раҳбарларини глобал исишнинг олдини олиш учун чоралар кўришга чақирган. Баёнотда бу муаммо дунё саломатик тизими учун энг катта таҳдид эканлиги қайд этилган. Матнни нашр қилган журналлар орасида «The Lancet» ва «New England Journal of Medicine» ҳам бор.

«Дунё саломатлик тизимига энг катта таҳдид — бу давлат раҳбарларининг глобал ҳарорат ўсишини 1,5 даражада ушлаб тура олмаслиги», дейилган баёнотда. Мурожаат муаллифлари бутун дунё бўйлаб глобал исиш билан боғлиқ инсон саломатлиги учун кўплаб хавф-хатарларга ишора қилган. Бундан ташқари, муҳаррирлар ҳароратнинг кўтарилиши асосий экинлар ҳосилдорлигининг пасайишига таъсир қилишини қайд этган. Муаллифлар қанчалик бой бўлишидан қатъи назар, ҳеч бир мамлакат иқлим билан боғлиқ экологик инқироздан ўзини тўлиқ ҳимоя қила олмаслигини таъкидлаган.

Аввалроқ глобал исиш хавфли вирусларни юзага чиқариши мумкинлиги айтилганди. Шунингдек, олимлар глобал фалокатнинг биринчи аломатини маълум қилган.