Россиянинг Санкт-Петербург шаҳрида бинони портлатиш билан таҳдид қилган Ўзбекистон фуқароси ҳибсга олинди. Бу ҳақда «78.ru» хабар берди.

Маълум бўлишича, «Лахта Центр» биноси қўриқчиси бу масалада полицияга мурожаат қилган. Унинг сўзларига кўра, бинонинг 6-қаватидан «Пастки қаватда 85 кун ичида портлайдиган бомба бор», деб ёзилган таҳдидли ёзув топилган. Ҳуқуқ-тартибот идоралари ходимлари бинодан портловчи мослама топмаган. Шу сабабли эвакуация ишлари амалга оширилмаган.

Таъкидланишича, гумонланувчи қидирув давомида қўлга олинган. Айтилишича, у 2001 йилда туғилган Ўзбекистон фуқароси бўлган. Унинг «Ренессанс Констракшн» қурилиш компаниясида ишлаши айтилган. Гумонланувчига қарши «Теракт ҳақида ёлғон хабар бериш» моддаси бўйича жиноят иши очилган. Йигит ҳеч қаерга кетмаслик ҳақидаги ёзма кўрсатмаси билан озод қилинган. У уч йилгача қамоқ жазосига ҳукм қилиниши мумкин эди.

Аввалроқ Россиядаги дўконларнинг бирида ўзбекистонлик аёлни ўлдиришда гумонланган эркак ушланганди. Шунингдек, Россияда ўзбекистонлик эркак 3 нафар қизни зўрлашда айбланиб, қамоққа олинган.