Шимолий Корея етакчиси Япония судига чақирилди
Шимолий Корея етакчиси Ким Чен Ин Японияда яшовчи бир неча этник корейсларнинг компенсация талабларини кўриб чиқиш учун Япония судига чақирилди. Бу ҳақда «The Guardian» хабар берди.
Маълум қилинишича, Эйко Кавасаки ва бошқа 4 нафар қочқин Шимолий Корея ҳукуматига қарши товон талаб қилиб, Токио округ судига шикоят қилган. Улар КХДРнинг кўчириш дастури доирасида инсон ҳуқуқларининг бузилишига дуч келганини айтиб, ҳар бирларига 100 миллион иен миқдорида товон пули тўлашини талаб қилган.
Таъкидланишича, Ким Чен Ин 14 октябрь куни Япония суд мажлисига келиши керак. Маълумот учун, тахминан 93 минг этник корейс ва уларнинг оиласи Иккинчи жаҳон урушидан олдин ва уруш пайтида Япония кон ва фабрикаларида ишлаш учун мажбуран олиб келинган, чунки мамлакат 1910–1945 йилларда Корея ярим оролини мустамлакага айлантирган.
Аввалроқ Шимолий Корея нима учун Жанубий Корея билан алоқаларни узгани маълум қилинганди. Шунингдек, Шимолий Корея етакчиси армиянинг жанговар тайёргарлигини кучайтиришга чақиргани ҳақида хабар берилган.
