Тошкент шаҳри Шайхонтоҳур туманида 30 август куни мастлиги гумон қилинган аёл йўл-патруль хизмати ходими билан жанжаллашгани хабар қилинганди. Шаҳар Ички ишлар бош бошқармаси ахборот хизмати аёлга чора кўрилганини маълум қилди.

Маълум қилинишича, 30 август куни соат 02:00 да тумандаги Ибн Сино деҳқон бозори яқинида тунги хизматда бўлган Йўл-патруль хизмати ходими Э.Худойберганов кўринишидан мастлик аломати сезилган, хатти-ҳаракатлари шубҳали бўлган аёлнинг «Matiz»ни бошқармоқчи бўлганини кўрган. «Lacetti» русумли хизмат автомобилини йўл четига тўхтатиб, аёл билан мулоқот қилган. Суҳбат давомида ходим фуқаро Д.Т.ни мастликда гумонлаб, транспорт воситасини бошқаришига йўл қўймаган. Шундан сўнг аёл турли сўзлар билан ходимни ҳақорат қилган.

Қайд этилишича, Д.Т. жамоат жойида юриш-туриш қоидаларини бузгани, Йўл-патруль хизмати ходими Э.Худойбергановни турли сўзлар билан ҳақорат қилгани бўйича тегишли ҳужжатлар тўпланиб, жиноят ишлари бўйича туман судига юборилган. Суд аёлга нисбатан Маъмурий жавобгарлик тўғрисидаги кодекснинг 194-моддаси 1-қисми (Ички ишлар органлари ходимининг қонуний талабларини бажармаслик) ва 183-моддаси (Майда безорилик) билан 5 кун муддатга қамоқ жазоси тайинлаган.

Эслатиб ўтамиз, аввалроқ Самарқандда эркак ички ишлар ҳодимини ҳақорат қилиб, юзига ургани хабар қилинганди. Шунингдек, Йўл-патруль хизмати ходимларини ҳақорат қилган блогер жазолангани ва Сирдарёда Йўл-патруль хизмати ходими фаолиятига тўсқинлик қилган 6 йигитга чора кўрилгани маълум қилинган.