Жиззах вилояти Пахтакор туманида 7 сентябрь куни 6 ёшли бола асфальт ётқизиш машинаси остида қолиб кетди. Бу ҳақда вилоят Йўл ҳаракати хавфсизлиги бошқармаси ахборот хизмати хабар қилди.

Маълум бўлишича, Пахтакор тумани Боғишамол қишлоғида 7 сентябрь куни соат 17:10 атрофида 2016 йилда туғилган Т.Ш. велосипеди билан маҳалла ҳудудида иш жараёнини ўтказаётган асфальт ётқизиш машинаси орқа томонига яқинлашган. Ҳайдовчи орқага қараб ҳаракатланган пайтида бола машина билан тўқнашиб, йиқилган ва техника остида қолиб кетган.

Қайд этилишича, оқибатда бола воқеа жойида ҳалок бўлган. Ҳолатга ҳайдовчининг бепарволиги, иш вақтида хавфсизлик қоидаларига риоя қилинмагани, ҳайдовчи олдида уни огоҳлантириб туриши керак бўлган ёрдамчи ишчиларнинг йўқлиги сабаб бўлган.

Таъкидланишича, ҳолат юзасидан оғир техника воситаси тегишли бўлган фирма раҳбарига Маъмурий жавобгарлик тўғрисидаги кодекснинг 147-моддаси (Йўлларга, йўл иншоотларига, йўл ҳаракатини тартибга солиб турувчи техник воситаларга шикаст етказиш, уларни сақлаш қоидаларини бузиш) билан маъмурий баённома тузилган.

Эслатиб ўтамиз, аввалроқ Наманганда юк машинаси 2 ёшли болани босиб кетгани хабар қилинганди. Шунингдек, Тошкент вилоятида «Captiva» уриб юборган 5 ёшли бола вафот этгани ва Бухорода «Nexia» 6 ёшли болани уриб юборгани маълум қилинган.