Ўзбекистонга яқин кунларда 1 миллион 200 минг дона «Pfizer/BioNTech» va «AstraZeneca» вакциналари олиб келинади. Бу ҳақда Соғлиқни сақлаш вазирлиги ахборот хизмати хабар қилди.

Маълум бўлишича, ҳозирда мамлакатда  4 турдаги: «ZF-UZ-VAC2001», «AstraZeneca», «Sputnik V», «Moderna» вакциналаридан эмлаш жараёнларида фойдаланиб келинмоқда. «Pfizer/BioNTech» вакцинаси ўзбекистонликлар эмланадиган 5-вакцина бўлади.

Қайд этилишича, айни кунгача Ўзбекистонда жами 15 978 140 доза вакцинадан фойдаланилган. Шу кунгача тўлиқ эмланган фуқаролар 2 710 887 нафарни ташкил қилмоқда.

Эслатиб ўтамиз, аввалроқ Ўзбекистонга «Спутник V» вакцинасининг 40 минг дозали 1-компоненти олиб келингани хабар қилинганди. Шунингдек, Ўзбекистонга яна 1 миллион доза ўзбек-хитой вакцинаси олиб келингани ва Ўзбекистонга 300 минг дозага яқин «AstraZeneca» вакцинаси келтирилгани маълум қилинган.