Қашқадарё вилояти Муборак туманида 4 сентябрь куни юқори тезликда ҳаракатланган юк машинаси «Cobalt» билан тўқнашди. Бу ҳақда вилоят Ички ишлар бошқармаси ахборот хизмати хабар берди.

Маълум бўлишича, воқеа тонгда туманнинг Хитой қишлоғи ҳудудидан ўтган Ғузор–Бухоро–Нукус–Бейнов автомобиль йўлида содир бўлган. Аниқланишича, «Isuzu» юк машинаси юқори тезликда ҳаракатланиб, бошқарувни йўқтоган ва қарама-қарши йўналишга чиқиб кетган.

Аниқланишича, юк машинаси йўналиш бўйлаб келаётган «Cobalt» автомашинага бориб урилган. Оқибатда енгил автомобиль ҳайдовчиси олган тан жароҳати сабаб ҳалок бўлган. Мазкур ҳолат юзасидан терговолди суриштирув ишлари олиб борилмоқда.

Аввалроқ Сурхондарёда қарама-қарши йўналишга чиқиб кетган «Lacetti» юк машинаси билан тўқнашгани хабар қилинган. Шунингдек, Қашқадарёда юқори тезликда ҳаракатланган «Lacetti» ва юк машинаси тўқнашиб кетган.