Шавкат Мирзиёев кимларни энг яқин дўсти деб билишини айтди
Шавкат Мирзиёев 9 сентябрь куни Ўзбекистон Либерал-демократик партияси қурултойидаги нутқида кимларни энг яқин дўсти деб билишини айтди. Бу ҳақда партия ахборот хизмати хабар қилди.
Маълум бўлишича, Президент кейинги йилларда ҳам оммавий ахборот воситаларини ҳар томонлама қўллаб-қувватлашини, журналистларнинг эркин фаолият юритишлари учун зарур шарт-шароитлар яратилишини билдириб, улар энг яқин дўсти эканини айтган:
«Мен ҳақиқат ва адолатни ўз эътиқоди деб биладиган барча журналистларни ислоҳотларнинг фаол иштирокчилари деб биламан ва улар ҳамиша Президент ҳимоясида бўлади. Бу фикрни бугун яна бир бор таъкидлайман».
Аввалроқ Президент Ўзбекистон Либерал-демократик партияси қурултойида қатнашиши хабар қилинганди. Шунингдек, қурултойда Шавкат Мирзиёев келгуси беш йилдаги Янги Ўзбекистон стратегияси ҳақида айтгани ва Президент ўтган 5 йилдаги натижалар ҳақида гапиргани маълум қилинган.
