Тошкент шаҳри ва вилоятида 10 сентябрь куни «Ҳизб ут-таҳрир»нинг 29 нафар аёл аъзоси қўлга олинди. Бу ҳақда Ички ишлар вазирлиги ахборот хизмати хабар қилди.

Маълум бўлишича, Тошкент шаҳри ва Тошкент вилоятида 10 сентябрь куни ҳуқуқни муҳофаза қилувчи органлар томонидан тезкор тадбир ўтказилган. Унда шаҳарнинг Шайхонтоҳур, Учтепа, Олмазор, Сергели ва Яккасарой туманлари ҳамда вилоятнинг Зангиота, Тошкент ва Қибрай туманларида «Ҳизб ут-таҳрир» диний экстремистик ташкилотининг «Аёллар қаноти» жамоаси аъзоси ҳисобланган 29 нафар аёл қўлга олинган.

Қайд этилишича, улар Жиноят кодексининг бир қатор моддалари билан айбланиб, ҳозирда қидирувда бўлган 1970 йилда туғилган Л.У. ва 1974 йилда туғилган М.С. билан интернет орқали алоқа қилиб, уларнинг кўрсатмалари асосида аҳли орасида ташкилот ғояларини тарғиб қилиш ва ташкилот сафини кенгайтириш билан шуғулланиб келган.

Таъкидланишича, уларнинг яшаш манзиллари ва уяли алоқа воситаларида экстремистик мазмундаги материаллар мавжудлиги аниқланиб, процессуал тартибда расмийлаштириб олинган. Ҳозирда тергов-суриштирув ишлари олиб борилмоқда.

Эслатиб ўтамиз, аввалроқ Наманган ИИБ экстремистик гуруҳларга қўшилиб кетган 5 нафар аёлга қидирув эълон қилгани хабар қилинганди. Шунингдек, Самарқандда «Ҳизб ут-таҳрир»нинг 3 нафар аъзоси қўлга олингани ва Жиззахда диний экстремистик ташкилот тарафдорлари ушлангани маълум қилинган.