Қашқадарёнинг Муборак туманида ишга киритиб қўйишини айтиб фуқаролардан 3 минг доллар ва 10 миллион сўм олган собиқ Ички ишлар бўлими ходими қўлга олинди. Бу ҳақда «Nasafnews» хабар берди.

Маълум  бўлишича, 28–29 сентябрь кунлари Давлат хавфсизлик хизмати Муборак шаҳри бўлинмаси, Қашқадарё вилоят бошқармаси ва Муборак тумани прокуратураси билан ҳамкорликда тезкор тадбир ўтказилган. Таъкидланишича, унда ўзини прокуратура ходими деб таништириб юрган 41 ёшли аввал судланган собиқ Ички ишлар бўлими ходими К.Ж. ва 35 ёшли Муборак туманида яшовчи Э.З.лар қўлга олинган.

Айтилишича, улар 1991 йилда туғилган фуқаро О.Ж.ни «Eriell» компаниясига ишга киритиб қўйишини айтиб, алдов йўли билан 3 минг доллар талаб қилган ва 1000 доллар олаётган вақтида ашёвий далиллар билан қўлга олинган. Шунингдек, олиб борилган суриштирувлар давомида К.Ж. ва Э.Л. ишга киритиб қўйишини айтиб алдов йўли билан Муборак туманида яшовчи фукаролар С.Н.дан 1000 доллар, Ю.С.дан 1000 доллар ва А.У.дан 10 000 000 сўм қийматидаги пул маблағини олгани аниқланган. Қайд этилишича, уларга нисбатан Жиноят кодексининг 168 ва 211-моддалари билан жиноят иши қўзғатилган.

Аввалроқ Қашқадарёда сохта орган ходимига жиноят иши қўзғатилганди. Шунингдек, Бухорода ички ишлар органига ишга киритиб қўйиш учун 2,5 минг доллар олган шахс ушланган.