Хитойнинг Ухан шаҳрида коронавирус 2019 йилнинг ёзида тарқалгани маълум қилинди. Бу ҳақда «Internet 2.0» киберхавфсизлик бўйича консалтинг компанияси тадқиқотига асосланган «Telegraph»га таяниб, «РИА Новости» хабар берди.

Маълум қилинишича, «Internet 2.0» таҳлиллари Уханнинг Хубей провинциясида ПЦР лабораториялари учун ускуналар сотиб олиш шартномаларига асосланган. Тадқиқотда 2019 йилда харажатлар 2018 йилга нисбатан деярли икки баравар кўпайгани маълум бўлган. Ҳисобот муаллифлари вирусни аниқлайдиган тест ускунлари учун «харажатларнинг сезиларли ўсиши» 2019 йилнинг ёзида қайд этилганини аниқлаган.

Таъкидланишича, харажатларнинг катта қисми касалликлар назорати ва профилактикаси билан боғлиқ органлар томонидан амалга оширилган. Улар орасида Хитойнинг Хубейдаги касалликларни назорат қилиш ва олдини олиш маркази, Ухандаги ҳарбий шифохона, Ухан вирусология институти ҳамда Ухан фан ва технология университети бор.

«Биз таҳлил қилинган маълумотларга асосланиб, шуни хулоса қилдикки, Уханда вирус 2019 йилнинг ёзида фаол равишда тарқалган. Ёзнинг май ойида харажатларнинг кўпайиши бу инфекция белгиланган санадан ҳам аввалроқ тарқалганини билдиради», дейилган нашрда.

Шунингдек, таҳлил натижалари аллақачон АҚШ ҳукумат амалдорларига топширилгани айтиб ўтилган.

Аввалроқ Уханда коронавирус тарқалгани ҳақида хабар бериб, изсиз йўқолган журналист топилгани хабар берилганди. Шунингдек, коронавируснинг Ухандан тарқалишига оид янги тахмин илгари сурилгани маълум қилинганди ҳамда Хитой ЖССТнинг коронавирус келиб чиқишини текшириш режасини кескин рад этганди.