Европа мамлакатларининг Россиядан газ етказиб бериш бўйича узоқ муддатли шартномаларга эришмагани минтақада энергетик инқирозга сабаб бўлди. Бу ҳақда Сербия президенти Александр Вучич нутқига таяниб, «РБК» хабар берди.

Келтирилишича, Вучич буни Европа Иттифоқи ва Ғарбий Болқон саммитидаги нутқида айтиб ўтган.

«Энергетик инқирознинг биринчи сабаби углерод солиғи ҳисобланади. Иккинчи сабаб эса март ойида давлатлар коронавирус тўлқинидан чиқиб кетяпмиз, деб ишлаб чиқаришни захирасидаги арзон газ билан оширишни хоҳлагани бўлди», — деган Сербия раҳбари ва Европа давлатлари ўзининг захирадаги газини сарфлаганини ҳамда Россия билан узоқ муддатли газ сотиб олиш бўйича шартнома тузмаганини айтган.

«Энди руслар, Путин — мутлақ ‘подшоҳʼ, у газни кимга, қандай нархда сотишга ва нархнинг қанчага кўтарилишига таъсир қилиши мумкин», — дея қайд этган у.

Шунингдек, президент кўмир нархи ҳам кўтарилганига тўхталиб ўтган. «Ҳамма яна атом электр станцияларини 100 фоизга фаоллаштирди. Келинг, энди улар энергия сотишга рухсат берилмаган Беларусь билан нима қилишини кузатамиз», — деган Вучич.

У Белграднинг «Болқон оқими» газ қувурини қуриш тўғрисидаги қарори жуда ақлли экани, чунки бу Сербияни арзон нархда газ билан таъминлашга имкон берганини таъкидлаган. «Энди бизда электр ва газ етарли», — деган президент ва бошқа Европа мамлакатларидан фарқли ўлароқ, уйларни иссиқлик билан таъминлашга ваъда берган.

Аввалроқ Саакашвили ўзини «Путиннинг шахсий маҳбуси» деб атаганди. Шунингдек, Рамзан Қодиров ўзига Путиннинг «лойиҳаси» мақомини берганди.