Россиянинг Пермь шаҳридаги Егошиха, Данилиха, Ива ва Кама дарёлари яшил рангга кирди. Бу ҳақда Пермь туманлараро экологик прокуратурага таяниб, «Ren Tv» хабар берди.

Маълум қилинишича, ҳозирда барча сув ҳавзаларидан намуна олинган бўлиб, тегишли назорат бошқармаларидан маълумот сўралган. Воқеага нима сабаб бўлгани текширув натижаси чиққач эълон қилинади.

Қайд этилишича, тўрт дарёдаги сув 5 октябрь куни яшил рангга кирган. «Т Плюс» иссиқлик таъминоти компанияси маълумотларига кўра, сув унга махсус «Уранин-А» бўёғи қўшилгандан сўнг шундай рангда оқа бошлаган. Таъкидланишича, бўёқ мутлақо зарарсиз ҳисобланади.

Маълумот ўрнида, Аргентинанинг Чубут вилоятида жойлашган дарё пушти рангга киргани хабар берилганди. Маълум қилинишича, ушбу ҳолат ўта хатарли бўлиб, дарёнинг бу рангга киришига заҳарли моддалар сабаб бўлган.

Экологларнинг маълумотларига кўра, бунга сувга чиқиндиларни, хусусан, қисқичбақаларни консерва қилишда ишлатиладиган натрий сулфитни ташлайдиган балиқ овлаш компаниялари айбдор бўлиб, чиқиндилар нафақат ушбу дарё, балки минтақадаги ерости суви ва оқибатда ичимлик сувини ҳам ифлослантиради.

«Бу ранг натрий сулфитга боғлиқ. Қонунчилик бундай суюқликни ташлаб юборишдан олдин зарарсизлантиришни талаб қилади. Акс ҳолда у катта хавф туғдиради», — дейди мутахассислардан бири.

Аввалроқ Қора денгизнинг Россия соҳилларига яқин қисми яшил рангга киргани хабар берилган. Шунингдек, Бирлашган Араб Амирликларида ноёб кўринишга эга кўл топилгани маълум қилинганди.