Халқаро олимлар гуруҳи Сомон йўли марказидан чиққан ғайриоддий сигнални ёзиб олди. Бу ҳақда «Sci News» хабар берди.

Маълум қилинишича, Австралиянинг CSIRO миллий илмий агентлиги олимлари Германия, АҚШ, Канада, Жанубий Африка, Испания ва Франция тадқиқотчилари билан бирга икки йил давомида «ASKAP» радиотелескопи ёрдамида осмонни ўрганган.

Жараён давомида галактика марказида ўзидан ғайриоддий сигнал чиқараётган ноодатий объектни аниқлаган. Дастлаб у кўринмаган, кейин ёруғлашиб, сўнг ғойиб бўлган. Бир қанча вақт ўтгач, яна пайдо бўлган.

«Объектнинг ёрқинлиги ҳам 100 марта кескин ўзгарган. Бундай объектни аввал кўрмаганмиз», — дейди мутахассислардан бири.

Қайд этилишича, 2020 йилнинг тўққиз ойи мобайнида муаллифлар олтита ноодатий радиосигнал ёзиб олган. Объектнинг аслида нима эканини аниқлашга бўлган уринишлар эса муваффақиятсиз тугаган. Ҳозирда бу бўйича тадқиқот ишлари давом эттирилмоқда.

Аввалроқ олимлар сайёрадаги илк юлдузлар қачон пайдо бўлганини хабар берганди. Шунингдек, Ерга ҳар йили қанча космик чиқинди тушаётгани маълум бўлган.