Фарғона вилояти Қўқон шаҳрида эркак хиёнат сабаб хотини ва қайноғасини пичоқлади. Бу ҳақда Олий суд ахборот хизмати хабар берди.

Маълум бўлишича, эркак хорижга ишлагани кетганда аёли ёшликдаги таниши муносабат ўрнатиб,  эрига хиёнат қилган. Эр уйга қайтгач, бундан хабар топган. 2020 йил 10 ноябрь куни у хотини билан жанжаллашиб, аёлни ота уйига ҳайдаб юборган. Бироқ 4 кун ўтгач, қизига совчи келиши ва уни кутиб олиши учун аёлнинг уйга қайтишига рози бўлган.

Қайд этилишича, совчилар кетгач, эркак қайноғаси билан спиртли ичимлик ичиб, хотинидан шикоят қилган. Бунинг оқибатида эр-хотин ўртасида жанжал келиб чиққан. Қайноғаси ҳам жанжалга аралашгач, эркак ароқ шишаси билан унинг бошига урган. Сўнг ошхона пичоғи билан қайноғасининг бўйни ва кўкрагига санчган. У ерга ҳолсиз йиқилгач, хотинининг ҳам орқа кўкрак қисмига пичоқ урган. Оқибатда эркак вафот этган, аёлнинг ҳаёти сақлаб қолинган.

Таъкидланишича, Жиноят ишлари бўйича Қўқон шаҳар суди эркакни Жиноят кодексининг 97-моддаси (Қасддан одам ўлдириш) 2-қисми «ж» банди ва 104-моддаси 2-қисми «л» бандига асосан айбдор деб топиб, 18 йил муддатга озодликдан маҳрум этган. Лекин у ҳимоячиси билан бирга вилоят судига апелляция берган. Бироқ апелляция инстанцияси суд ҳукмини ўзгаришсиз қолдирган ва апелляция шикоятини қаноатлантирмаган.

Аввалроқ Жиззахда эр қайнатасининг уйида хотинини пичоқлаганди. Шунингдек, Самарқандда эркак ярашишни рад этган аёлини ва қайноғасини пичоқлаб қўйган.