Аҳмад Масъуд қаршилик кучлари АҚШда хорижий агент сифатида рўйхатдан ўтди
«Толибон» ҳаракатига қаршилик кўрсатувчи Аҳмад Масъуд бошчилигидаги миллий қаршилик фронти АҚШда хорижий агент сифатида рўйхатдан ўтди. Бу ҳақда тегишли рўйхатга олиш ҳужжатига таяниб, «ТАСС» хабар берди.
Маълум қилинишича, қаршилик хорижий агент сифатида лоббичилик қилади ва америкалик сиёсатчиларни афғон мухолифатини қўллаб-қувватлашга кўндиради. Қаршилик Конгресс, АҚШ маъмурияти ва Америка халқи билан фаол алоқа ўрнатиш орқали Афғонистонда эркинлик ҳамда демократияни қўллаб-қувватлаши айтилган.
Ҳужжатда айтилишича, Афғонистондаги қаршилик ҳаракати «АҚШнинг Афғонистонга сўнгги 20 йил давомида киритган сармояларининг ҳимоячиси ва мамлакатни муросасизлик ҳамда терроризмдан халос қиладиган куч» бўлишга интилади.
Аввалроқ Аҳмад Масъуд бошчилигидаги қаршилик кучлари яна бир вилоятда фаолият бошлагани ва «Толибон» ҳаракати Панжшер қаршилик кучлари билан тўқнашувда жиддий зарар кўргани маълум қилинган.
