Олимлар Хаббл телескопи ёрдамида Ердан 400 ёруғлик йили узоқликда жойлашган ва сўнаётган CW Leonis юлдузини суратга олишга муваффақ бўлди. Бу ҳақда АҚШ миллий аэронавтика ва космик тадқиқотлар бошқармаси (NASA) хабар берди.

Маълум қилинишича, CW Leonis углерод юлдузи дастлаб Қуёшдан 3–5 баравар катта бўлган. Бироқ ҳозирга келиб юлдуз тахминан учдан бир қисмга қисқарган. Таъкидланишича, мазкур космик объектни кузатиш сўнгги йигирма йилдан бери давом этмоқда ва тадқиқотчилар 15 йил давомида (астрономия нуқтаи назаридан бу жуда қисқа вақт) CW Leonis’дан чиқадиган ёруғлик нури сезиларли даражада камайганини айтган.

NASA маълумотларига кўра, юлдузни ўраб турган қобиқнинг ёши камида 69 минг йилни ташкил қилади.

Аввалроқ Хаббл телескопи ноёб космик объектни суратга олгани ва NASA кинофильм қаҳрамонини ёдга соладиган туманли юлдузлар суратини эълон қилгани айтилган.