Хитойнинг олтинчи авлод махфий қирувчи самолёти суратга олинди — фото
Хитойнинг олтинчи авлод махфий қирувчи самолёти прототипи суратга олинди. Бу ҳақда «Ferra.ru» хабар берди.
Маълум қилинишича, ташқи томондан самолёт «Next Generation Air Dominance» (NGAD) ва «X-44 MANTA» контсепциясига ўхшайди. Мазкур қирвчи самолёт «Chengdu Aircraft Corporation» авиация корпорацияси томонидан ишланмоқда. Айнан шу компания мамлакат учун бешинчи авлод қирувчи самолётини ишлаб чиққанди.
Таъкидланишича, самолёт тасвири сунъий йўлдошдан суратга олинган. Суратда корпорациянинг «Chengdu»даги заводи ёнида жойлашган «Chengdu Aircraft Corporation» синов аэродромини кўриш мумкин. Шунингдек, суратда «J-20» ва «J-10» самолётлари, бир нечта учувчисиз учиш аппарати ва битта ноодатий самолёт тасвирланган.
Бу олтинчи авлод қирувчисининг прототипи экани расман тасдиқланмаган. Бироқ бу эҳтимолдан йироқ эмаслиги қайд этилган. Қизиғи шундаки, самолёт думсиз макетга эга. Шунга ўхшаш кўриниш америкаликлар томонидан «Next Generation Air Dominance» дастури доирасида ишлаб чиқилмоқда.
Аввалроқ Хитойнинг автомобиль ишлаб чиқарувчи компанияси учар таксини намойиш қилгани ва Қозоғистонда номаълум ҳарбий самолёт тасвирга олингани маълум қилинган.
