Тошкент шаҳар Миробод тумани ИИО ФМБ ходимлари гиёҳвандлик воситаларини флаерлар кўринишида реклам қилиб тарқатаётган 26 ёшли Ш.Ш.ни қўлга олди. Бу ҳақда шаҳар Ички ишлар бош бошқармаси хабар берди.

Маълум қилинишича, йигит гиёҳвандлик воситаларини тарқатишга қарши курашга йўналтирилган профилактик тадбирлар давомида қўлга олинган. Ашёвий далиллар сифатида ундан 1093 та гиёҳвандлик воситаси савдоси билан шуғулланувчи интернет дўконларни реклама қилувчи флаер олиб қўйилган.

Ш.Ш.нинг маълум қилишича, у билан Telegram орқали ўзини Ф. деб номлаган шахс боғланиб, флаерлар тарқатиш йўли билан даромад таклиф қилган. 29 октябрь куни Ф. Ш.Ш.га 1750–1800 та флаер берган. Уларнинг бир қисми Яшнобод ва Миробод туманларида тарқатилган.

Таъкидланишича, кейинчалик терговолди текшируви давомида 2003 йилда туғилган Ф.К. қўлга олинган. У 2021 йилнинг сентябрида махсус сайт орқали флаер тарқатиш билан боғлиқ «иш» топган. Флаерларни у тайёр ҳолда Мирзо Улуғбек туманидаги босмахонадан олган.

Ҳолат юзасидан босмахона ишчилари — 23 ёшли Р.Р. ва 36 ёшли Д.Х. қўлга олинган. Ашёвий далиллар сифатида 6 мингта тайёр флаер олиб қўйилган. Мазкур факт асосида тўпланган ҳужжатлар Миробод тумани ИИО ФМБга йўналтирилган.

Аввалроқ Самарқандда гиёҳванд модда сотмоқчи бўлганлар ушлангани ва Тошкент вилоятидаги божхона постида 156 килограмга яқин гиёҳванд модда ортилган юк машинаси тўхтатиб қолингани маълум қилинган.