Қашқадарё вилояти Китоб туманида 2 ноябрь куни «Nexia» ҳайдовчиси билан бирга ёниб кетди. Бу ҳақда Йўл ҳаракати хавфсизлиги бош бошқармаси матбуот хизмати хабар берди.

Маълум бўлишича, воқеа Қайнар маҳалласи ҳудудидан ўтувчи М-39 автомобиль йўлининг 1143-километрида содир бўлган. Унда 1990 йилда туғилган Ж.Ж. «Nexia» русумли автомобилни бошқараётиб, эҳтиётсизлиги оқибатида руль бошқарувини йўқотган ва йўл четидаги катта тошга урилиб, ағдарилиб кетган.

Йўл-транспорт ҳодисаси автомобилда ёнғин юзага келишига сабаб бўлган. Бунинг оқибатида ҳайдовчи воқеа жойида ҳалок бўлган. Мазкур ҳолат юзасидан Китоб тумани ички ишлар бўлими ҳузуридаги тергов бўлими томонидан тергов ҳаракатлари бошланган.

Аввалроқ Тошкентда «Lacetti» симёғочга урилиб, ёниб кетганди. Шунингдек, Наманганда «Nexiа» ёниб кетгани хабар қилинган.