Шавкат Мирзиёев Президент сифатида иккинчи марта қасамёд қилди
«Ўзбекистон халқига садоқат билан хизмат қилишга қасамёд қиламан», — дейди Президент
Шавкат Мирзиёев 6 ноябрь куни Қонунчилик палатаси ва Сенатнинг президент лавозимига киришишга бағишланган қўшма мажлисида иштирок этиши хабар қилинганди. Давлат раҳбари Президент сифатида иккинчи марта қасамёд қабул қилди.
Маълум бўлишича, Шавкат Мирзиёев Президент сифатида иккинчи марта қасамёд қилиб, мамлакат тарихида илк бор Президентнинг рамзий белгиларини қабул қилиб олган.
«Ўзбекистон халқига садоқат билан хизмат қилишга, республиканинг Конституцияси ва қонунларига қатъий риоя этишга, фуқароларнинг ҳуқуқлари ва эркинликларига кафолат беришга, Ўзбекистон Республикаси Президенти зиммасига юклатилган вазифаларни виждонан бажаришга тантанали қасамёд қиламан», — дейди давлат раҳбари.
Қайд этилишича, инаугурация маросими Сенатнинг янги биносида бўлиб ўтган. Мажлисни Марказий сайлов комиссияси раиси Зайниддин Низомхўжаев очиб берган. Шунингдек, раис президентликка қайта сайланган Шавкат Мирзиёевга Президент гувоҳномаси ва Марказий сайлов комиссиясининг шаҳодатномасини топширган.
Шундан сўнг Шавкат Мирзиёев Ўзбекистон Конституцияси ва Қуръони Каримга қўл қўйган ҳолда қасамёд қилди.
Таъкидланишича, мажлисда Шавкат Мирзиёевга президентлик рамзлари топширилган ва штандартлар билан боғлиқ бундай маросим Ўзбекистон тарихида илк марта ўтказилган.
Аввалроқ Ўзбекистон Президенти сайловининг якуний натижалари эълон қилинганди.
