Навоий вилояти ҳокими лавозимидан озод қилингани тасдиқланди
Навоий вилояти ҳокими Қобил Турсунов 8 ноябрь куни Президент фармони билан лавозимидан озод қилинди. Бу ҳақда Президент матбуот котиби хабар берди.
Қайд этилишича, Президентнинг тегишли фармонлари билан Қобил Турсунов Навоий вилояти ҳокими лавозимидан озод этилди, Нормат Турсунов Навоий вилояти ҳокими вазифасини бажарувчи этиб тайинланган.
Нормат Турсунов солиқ органлари тизимидаги фаолиятини 1994 йили Тошкент шаҳрининг ҳозирги Учтепа тумани давлат солиқ инспектори лавозимидан бошлаган. 2010–2017 йилларда у Жиззах вилояти давлат солиқ бошқармаси раисининг биринчи ўринбосари, сўнг Навоий вилояти давлат солиқ бошқармаси бошлиғи лавозимларида ишлаган. Нормат Турсунов ҳозирга қадар Тошкент шаҳар давлат солиқ бошқармаси бошлиғи лавозимида ишлаб келган.
Шунингдек, Қобил Турсуновнинг лавозимдан олиниш сабаби ҳозирча маълум эмас. У 2016 йил 25 декабрдан бери Навоий вилояти ҳокими вазифасида ишлаб келаётганди.
Эслатиб ўтамиз, аввалроқ халқ депутатлари Навоий вилояти кенгашида Қобил Турсуновни лавозимидан озод қилиш масаласи кўрилаётгани ҳақида хабар берилганди. Шунингдек, «Bugun.uz» манбаси унинг ўрнига Нормат Турсунов ҳоким вазифасини бажарувчи этиб тайинланишини маълум қилганди.
