«Ҳудудгаз Пойтахт» газ таъминоти филиали 8 ноябрь, душанба куни умумий қиймати 2,5 миллиард сўм бўлган 5 та тендер ўтказди. Ушбу тендерлардан тўрттаси (умумий қиймати 1 683 600 000 сўм) Тошкентнинг турли туманларидаги газ қувурларини таъмирлаш мақсадида ўтказилган. Охирги — 818,8 миллион сўмлик тендер эса Янгиҳаёт туманидаги 5118 та хонадонга янги газ ҳисоблагичларини ўрнатишга мўлжалланган.

Ҳужжатга кўра, газ узаткичларини ўрнатишни аниқловчи тендерга ташкилот раҳбари Рустам Эргашхўжаевич Азимов раислик қилган. Маълумотга кўра, тендерда «Smart gaz comfort company» МЧЖ ғалаба қозонган. Ғолиб жамиятнинг раҳбари Ислом Назаров бўлиб, у яна бир номи ўхшаш МЧЖ (Smart gaz comfort)нинг таъсисчиси ҳисобланади. Таъсисчилар қаторида, шунингдек, тендерга раҳбарлик қилган Рустам Эргашхўжаевич Азимовнинг қариндоши бўлиши мумкин бўлган Азимов Ойбек Рустамович ҳам мавжуд.

Тендерни Ойбек Азимов таъсисчилик қилаётган компания тўғридан-тўғри ютмаган бўлса-да, уни ғолиб компания билан яна бир жиҳат боғлаб туради. Яъни Ойбек Азимов ва Ислом Назаров таъсисчилик қилаётган «Smart gaz comfort» ва Ислом Назаровнинг ўзи таъсисчилик қилаётган ғолиб «Smart gaz comfort company» бир манзилда — Шайхонтоҳур тумани Беруний кўчасида жойлашган.

Қайд этилишича, газ ҳисоблагичларнинг ҳар бири 160 минг сўмдан нархланган.

Аввалроқ Наманганда 4,7 миллиард сўмлик қурилиш лойиҳалари тендерсиз бошлаб юборилгани аниқланганди. Шунингдек, Ўзбекистонда ноқонуний ўтказилган тендерлар сабаб давлат бюджетига қанча зарар етказилгани очиқланган.