Ҳиндистоннинг Уттар-Прадеш штатидаги энг гавжум шаҳар — Канпурда камида 89 кишида, жумладан, 17 нафар болада зика вируси аниқланди. Бу ҳақда «BBC» хабар берди.

Канпурнинг бош санитария шифокори Непал Сингхнинг айтишича, штатда зика вируси авж олган. Малакат ҳудудида эса ушбу хасталик илк маротаба 2017 йилда Гужаратда қайд этилган.

Таъкидланишича, асосий ташувчилари чивинлар бўлган ушбу вируснинг болалар орасида тарқалишига Гийена-Барре синдроми деб аталадиган кам учрайдиган аутоиммун касаллиги сабаб бўлган. Вирус Уттар-Прадешда биринчи марта тарқалишни бошлаган.

«Канпурда 23 октябрда вируснинг биринчи ҳолати қайд этилганидан буён юқтирганлар сони тобора ортиб бормоқда, улар орасида бир нафар ҳомиладор аёл ҳам бор», дейилади хабарда.

Таъкидланишича, Уттар-Прадеш бош вазири Йоги Адитьянатх инфекция тез тарқалаётганини айтган ва маҳаллий амалдорларга санитария чораларини кучайтиришни буюрган. «Ушбу касалликнинг хавфли эканини инобатга олган ҳолда, ҳар бир беморнинг саломатлиги доимий назоратда бўлиши учун алоҳида эҳтиёт чораларини кўриш зарур», — деган у.

Маълумот ўрнида, Ҳиндистонда коронавируснинг иккинчи тўлқини билан параллель равишда мукормикоз (энг хавфли неврологик инфекциялардан бири) билан касалланиш ҳолатлари кузатилганди. Вазиятнинг жиддийлашиши оқибатида иккита штатда эпидемия эълон қилинган.

Аввалроқ Ҳиндистонда коронавируснинг янги аломати қайд этилган. Шунингдек, АҚШнинг чет элдаги бир қатор вакилларида номаълум мия касаллиги аниқланганди.