Ўзбекистонда йўқ рейсларга билет сотган Россиянинг ​​«I FLY Airlines» авиакомпаниясига санкция тариқасида вақтинча тақиқ қўйилди. Бу ҳақда Транспорт қвазирлиги ахборот хизмати хабар берди.

Маълум бўлишича, «Ўзавиация» агентлиги 2020 йилнинг октябрь ойида авиакомпанияларга мамлакат аэропортларига чартер рейсларини амалга ошириш учун агентликдан тегишли рухсатнома олмасдан чипталарни сотиш амалиётини тугатиш тўғрисида огоҳлантириш хати юборилган. «I FLY Airlines» авиакомпанияси огоҳлантиришга қарамай рухсатномаларни олмасдан 2021 йил ноябрь ойида Москва–Урганч – Санкт-Петербург – Урганч – Москва, Навоий – Москва ҳамда Санкт-Петербург – Навоий – Санкт-Петербург йўналишларида парвозлари учун билет сотган.

Таъкидланишича, авиачиптада кўрсатилган вақтда йўловчилар аэровокзалларга келган ва белгиланган йўналишда парвознинг бажарилмаслиги улар ўртасида ижтимоий кескинликка олиб келган.

«Шу муносабат билан «Ўзавиация» агентлиги томонидан «I FLY Airlines» авиакомпаниясига санкция тариқасида Ўзбекистонга чартер парвозларини амалга оширишни вақтинчалик тўхтатиш тўғрисида қарор қабул қилинди. Авиакомпаниялар томонидан бундай ҳолатлар такрорланган тақдирда агентлик парвозларни амалга ошириш учун берилган экплуатация рухсатномаларни бекор қилади», — дейилади изоҳда.

Аввалроқ Тошкент аэропортида Истанбулга учмоқчи бўлган йўловчилар тўпланиб қолгани хабар қилинганди. Шунингдек, Урганчда йўқ рейсга билет сотилгани сабаб йўловчилар аэропортда узоқ вақт қолиб кетгани маълум қилинган.