Афғонистоннинг Панжшер вилоятида қаршилик фронти жангчилари «Толибон» ҳаракати патрулининг зирҳли техникасини ёқиб юборди. Бу ҳақда «Sputnik Афғонистон» хабар берди.

Маълум қилинишича, воқеа 9 ноябрь куни содир бўлган. «Ааmaj News»нинг таъкидлашича, қаршилик кучлари биринчи марта шундай ҳужум уюштирган.

Маълумот ўрнида, «Толибон» ҳаракати жангчилари Афғонистоннинг Боғлон вилоятида Панжшер қаршилик кучлари билан кечган шиддатли жангларда жиддий зарар кўрганди. Маълум қилинишича, жанглар Пули-Ҳисор ва Дих-Сала туманларида бўлиб ўтган. Бу ерда ҳаракат 60 дан ортиқ одамини йўқотиб, чекинишга мажбур бўлган. Боғлон вилояти жануби-шарқда Афғонистонда ҳаракат ҳокимият тепасига келганидан кейин қаршилик марказига айланган Панжшер вилояти билан чегарадош ҳисобланади.

«Толибон» ҳаракати ва миллий қаршилик фронти ўртасида Бағлон вилоятида ҳам тўқнашув юз берганди. Маълум қилинишича, вилоятнинг Андароб ҳудудида бўлиб ўтган тўқнашувда қаршилик кучларининг икки қўмондони ҳалок бўлган. «Томонлар ўртасидаги жангда, шунингдек, ‘Толибон’нинг 7 нафар аъзоси йўқ қилинди», дейилган хабарда.