Янгиликлар - 18:29 · 09.11.2021

Қирғизистонда «Ҳизб-ут Таҳрир» ташкилотининг ўзбекистонлик етакчиси қўлга олинди

Қирғизистон Миллий хавфсизлик давлат қўмитаси мамлакат жанубида яширин экстремистик тармоқ ташкил этган «Ҳизб-ут Таҳрир» диний экстремистик ташкилоти етакчисини қўлга олди. Бу ҳақда қўмита матбуот хизматига таяниб, «Akipress» хабар берди.

Фото: «Akipress»

Маълум қилинишича, қўлга олинган фуқаро Ш.Ш. шахсини тасдиқловчи қалбаки ҳужжатдан фойдаланиб, Қирғизистон ҳудудида яшириниб юрган.

«Ўш шаҳри ҳудудида 2021 йил 4 ноябрь куни ‘Ҳизб-ут Таҳрир’ экстремистик ташкилотининг Ўзбекистондаги фаолиятига масъул бўлган, Ўзбекистон ҳуқуқ-тартибот идоралари томонидан қидирувга берилган Ш.Ш. қўлга олинди», дейилади хабарда.

Қайд этилишича, тўпланган далиллар асосида Қирғизистон Жиноят-процессуал кодексининг 98-моддасига асосланиб, Ш.Ш. Миллий хавфсизлик давлат қўмитасининг вақтинчалик сақлаш ҳибсхонасига жойлаштирилган.

Аввалроқ Тошкент вилоятида «Жиҳодчилар» экстремистик оқимининг 10 нафар аъзоси ушлангани хабар қилинганди. Шунингдек, Тошкент шаҳри ва вилоятида «Ҳизб ут-Таҳрир»га аъзо 29 нафар аёл қўлга олингани ва Хоразмда террористик гуруҳ фаолиятига чек қўйилгани маълум қилинган.