Самарқанд вилояти Нарпай туманида бир оиланинг 4 нафар аъзоси ис газидан вафот этгани маълум бўлди. Бу ҳақда вилоят прокуратураси матбуот хизмати «Bugun.uz»га маълум қилди.

Маълум қилинишича, 22 октябрь куни туманнинг Нарпай маҳалласида яшовчи фуқаро Ж. Саъдинов (1984 йилда туғилган), унинг турмуш ўртоғи Ш. Зияева (1987 йилда туғилган) ва 2 нафар вояга етмаган фарзандлари М.Хайруллаев (2012 йилда туғилган) ҳамда Ж. Хайруллаевнинг (2018 йилда туғилган) мурдаси яшаш уйида ис газидан заҳарланган ҳолда тан жароҳатларисиз топилган.

Ҳодиса жойини кўздан кечиришда марҳумлар ётган хонада қўл бола усулда ясалган, табиий газ тармоғига уланган иситиш печи мавжуд бўлиб, мазкур печнинг дуд-бўронида қушлар ин қурганлиги натижасида хас-хашаклар билан тўлиб қолганлиги аниқланган.

Қайд этилишича, ҳодиса юзасидан Нарпай туман прокуратураси томонидан Жиноят кодексининг 259-моддаси (Ёнғин хавфсизлиги қоидаларини бузиш) 2-қисми «а»,«б» банди билан жиноят иши қўзғатилган. Жиноят иши тергов ҳаракатларни ўтказиш учун Нарпай туман Ички ишлар бошқармасига юборилган.

Аввалроқ Самарқандда 10 кунда 8 киши ис газидан заҳарланиб, ҳалок бўлганди. Шунингдек, Самарқандда 4 фуқаро иситиш печидан чиққан ис газидан заҳарланиб, вафот этган.