Америкалик тадбиркор Илон Маск «Tesla» акциялари нархи тушиши оқибатида 2 сутка ичида 50 миллиард доллардан ортиқ зарар кўрди. Бу ҳақда «Bloomberg» агентлиги хабар берди.

Маълум қилинишича, 9 ноябрь ҳолатига кўра, «Tesla» акциялари нархи 893 еврони ташкил қилган, бу аввалги кунга нисбатан 12,76 фоизга кам натижа кўрсатган. 6 ноябрь куни Илон Маск Twitter’даги саҳифасида сўровнома ўтказган ва обуначиларидан «Tesla» акцияларининг 10 фоизини сотиш-сотмаслиги борасида овоз беришни сўраган.

Қайд этилишича, тадбиркор ўзи билан боғлиқ солиқ тўлашдан бўйин товлаш ҳақидаги миш-мишлар сабаб компания акцияларининг бир қисмини сотишни таклиф қилган. Сўровда 3 миллионга яқин фойдаланувчи иштирок этиб, 57,9 фоизи акцияларни сотиш таклифини қўллаб-қувватлаган, 42,1 фоизи қарши чиққан.

Унинг сўзларига кўра, у нақд маош ёки мукофот пули олмайди, унинг бутун бойлиги акция шаклида мавжуд бўлиб, шунинг учун компаниядаги акцияларини сотиш солиқ тўлашнинг ягона йўли ҳисобланади.

Аввалроқ Илон Маск триллионерга айланиши мумкинлиги маълум қилинганди. Шунингдек, бир ҳафтада деярли 10 млрд долларга бойигани ҳақида хабар берилган.