Россия президенти Владимир Путин Германия канцлери вазифасини бажарувчи Ангела Меркель билан 10 ноябрь куни телефон орқали Беларусь-Польша чегарасидаги вазиятни муҳокама қилди. Бу ҳақда «РИА Новости» хабар берди.

Маълум қилинишича, суҳбат Германия томонининг ташаббуси билан амалга оширилган.

«Беларуснинг Европа Иттифоқи давлатлари билан чегараларидаги қочқинлар билан боғлиқ вазият батафсил кўриб чиқилди. Миграция инқирозининг гуманитар оқибатларидан хавотир билдирилди. Путин ва Меркель ушбу мавзудаги суҳбатни давом эттиришга келишиб олди», дейилади Путин матбуот хизмати хабарида.

Суҳбатда Путин Европа Иттифоқига аъзо давлатларнинг Минск билан алоқаларида миграция инқирози муаммосини муҳокама қилишни таклиф қилган. Меркель эса Путиндан Беларусь ва Польша чегарасидаги муҳожирлар билан боғлиқ вазиятга аралашишни сўраган.

«Канцлер Меркель бугун президент Путинга Беларусь ва Польша чегарасидаги вазият юзасидан қўнғироқ қилди. У Беларусь режими томонидан муҳожирларни воситалаштириш ғайриинсоний ва қабул қилиб бўлмаслигини таъкидлаб, президент Путиндан бунга таъсир ўтказишни сўради», — дейди Германия Вазирлар Маҳкамаси вакили.

Маълумот ўрнида, Беларусь Давлат чегара қўмитаси 8 ноябрда Яқин Шарқ ва Африкадан келган қочқинларнинг катта гуруҳи Беларуснинг Польша билан чегарасига йўл олгани ҳақида хабар берган. Шу куни кечқурун департамент республиканинг Польша билан чегарасида 2 мингдан ортиқ қочқин, жумладан, кўплаб аёллар ва болалар чегара чизиғидаги Польша тўсиқлари олдида эканини айтган.

Охирги пайтда Литва, Латвия ва Польша Беларусь билан чегарада қўлга олинган ноқонуний муҳожирлар сони кўпайгани ҳақида хабар берган ва Минскни миграция инқирози юзага келганликда айблаган. Минск эса барча айбловларни рад этмоқда. Вазият муносабати билан Польша президенти Беларусь билан чегарадош ҳудудларда фавқулодда ҳолат жорий қилган, чегарани ҳимоя қилишга армия ва полиция жалб қилинган. Беларусь президенти Александр Лукашенко Минск бундан буён Европа Иттифоқи мамлакатларига ноқонуний муҳожирлар оқимини тўхтатмаслиги, «Ғарб санкциялари туфайли бунинг учун на пул, на энергия» борлигини айтган. Беларусь чегарачилари Литва, Польша ва Латвия муҳожирларни Беларусь ҳудудига мажбуран чиқариб юбораётгани ҳақида бир неча бор баёнот берган.

Аввалроқ Литва Беларусь ва Польша чегарасига қўшимча ҳарбийлар юборгани маълум қилинган. Шунингдек, Меркель ва Путин ўртасидаги энг жиддий келишмовчилик қачон юз бергани айтилганди.