Ўзбекистоннинг энг кўп чанг тўпланган шаҳарлари рўйхати эълон қилинди. Бу ҳақда «Ўзгидромет» хабар берди.

Маълум қилинишича, 2021 йил 4 ноябрь куни Ўзбекистон ҳудудига Урал ҳудудидан совуқ ҳаво оқими кириб келган. Совуқ фронт зонасида шамолнинг кучайиши 12–15 метр/секундгача, Бухоро, Навоий, Жиззах вилоятларининг баъзи жойларида эса 20–25 метр/секундгача кучайиши кузатилган.

Қайд этилишича, шамол таъсирида тупроқнинг юқори қуриган устки қатлами кўтарилиб, республиканинг бир қатор ҳудудларига кўришнинг 100–200 метргача ёмонлашиши билан чангли, қумли туман таъсирини юзага келтирган. Атмосферада чанг миқдори кескин ўсган.

Маълумотларга кўра, 4 ноябрда ҳавода чанг миқдори бўйича максимал аҳамиятлилик қуйидаги ҳудудларда қайд этилган. Унга кўра, чанг миқдори:

• Тошкентда белгиланган меъёрдан 33 баробарга;
• Чирчиқда 26 баробарга;
• Гулистон ва Олмалиқда 20 баробарга;
• Бекободда 18 баробарга;
• Бухорода 14 баробарга;
• Ангрен ва Навоийда 8 баробарга;
• Самарқандда 4 баробарга;
• Сариосиё, Наманган, Урганч, Фарғона, Қўқонда эса тахминан 2 баробарга ошган.

Келтирилишича, тунги соатларда атмосферанинг қуйи қатламида ҳосил бўлган инверцион тўхтатувчи қатлам натижасида ер устки қатламида ҳавонинг паст даражаси чанг тарқалишига тўсқинлик қилган. 5 ва 6 ноябрда кундузи атмосфера ҳавосининг чанг билан ифлосланиши пасая бошлади ҳамда 8 ноябрь кундуз куни республикада атмосфера ҳавоси ифлосланиши фақат айрим шаҳарларда меъёрдан юқори бўлган.

Тошкент шаҳрида атмосфера ҳавоси ифлосланиши устидан кузатувлар автоматлаштирилган мониторинг станцияларидан ҳар соатда амалга оширилган. Бошқа шаҳарларда кузатувлар дискрет тартибда олиб борилган.

Маълумот ўрнида, чанг бўрони пойтахтда 4 ноябрь куни кечга бориб бошланган. Мазкур чанг-ғубор ҳодисаларига нима сабаб бўлгани очиқланганди. Бунинг ортидан Тошкент дунёнинг экологияси ифлос шаҳарлар рўйхати етакчисига айланди. Шунингдек, ССВ чангли ҳаводан ҳимояланиш бўйича тавсиялар берганди. Орадан вақт ўтиб, ўзбек олимлари тарқалган чанг бўронидан кейин чўккан чанг таркибини ўрганиб чиққан. Намуналарда инсон саломатлиги учун хавфли пестицидлар мавжуд эмаслиги аниқланган.

Эслатиб ўтамиз, аввалроқ Шавкат Мирзиёев мамлакатда кузатилган чанг бўрони ҳақида гапирганди. Давлат раҳбари ҳам бу Ўзбекистоннинг қуми эмаслиги, қўшни давлатлардан келгани, лекин бу ҳодиса бизга сабоқ олиш учун етарли бўлиши кераклигини таъкидлаганди.