Ўзбекистонда Аи-80 маркали бензин нархи йил бошидан бери қанчага ўсгани маълум қилинганди. Иқтисодчи Отабек Бакиров ушбу маркали бензин нархининг ошишига муносабат билдирди.

Қайд этилишича, Аи-80 маркали бензин ишлаб чиқариш учун Ўзбекистонда Brent нефтидан фойдаланилмайди ва бу нарх масъулларига йўлланган танқидга жавоб бўла олмайди.

«Аи-80 бензин нархи ошишини оқлаш учун ўзбек масъуллари ишлатадиган ‘Brent нархи ошяпти’ далили бутунлай сохта ва ҳеч қандай танқидга жавоб бера олмайди. Ушбу бензинни ишлаб чиқариш учун бир грамм ҳам Brent типидаги нефть ишлатилмайди. Нафақат Brent типидаги, умуман, импорт нефть ишлатилмайди.

Маҳсулот ишлаб чиқариш учун ишлатиладиган, мамлакатда қазиб олинадиган нефтнинг умумқабул қилинган маркаси мавжуд эмас. Шимолий денгизда қазиб олинадиган ва энг олий нав ҳисобланадиган Brent типидаги нефтдан фарқли ўлароқ Ўзбекистон нефти оғир ва таркибида олтингугурт миқдори жуда юқори ҳисобланади. Солиштириш учун энг яқини деб ҳисобласак ‘Turkmen blend’ нави Brent’га нисбатан 20 фоизгача дисконт билан сотилади», — дейди иқтисодчи.

Шунингдек, у Brent нефти ва Аи-80 маркали бензин нархи ўртасида боғлиқлик ҳақида ҳам фикр билдирган.

«Бошқача айтганда, Аи-80 бензини 82 долларлик Brent типидаги нефтдан эмас, нари борса, 65 долларлик ўзбек нефтидан ишлаб чиқарилади. Ушбу маркали ёнилғини Brent’га боғлаш ноўринлигини ‘Ўзбекнефтегаз’нинг ўзи амалий ҳаракатлари билан аллақачон исботлаб бўлган. 2020 йил апрель-июнь ойларида нефть нархи йил бошидан ҳисоблаганда 3 баробаргача арзонлаган шароитда Аи-80 қанчага арзонлагани эсингиздами? Нефть арзонлаганда арзонлашмайдиган, нефть қимматлашса, қимматлашадиган Аи-80ни Brent’га боғлаш мумкинми? Йўқ, йўқ ва яна йўқ», — дея таъкидлаган Отабек Бакиров.

Аввалроқ «Ўзбекнефтгаз» АЖ Ўзбекистонда бензин нархининг кўтарилганига изоҳ берганди. Шунингдек, Товар-хомашё биржаси мутасаддилари иштирокида бўлиб ўтган матбуот анжуманида ҳам Ўзбекистонда бензин нархи ошаётганига муносабат билдирилган.