Шавкат Мирзиёев 12 ноябрь куни Туркия Президенти Ражаб Тоййиб Эрдўғон билан учрашди. Бу ҳақда Президент матбуот хизмати хабар берди.

Маълум бўлишича, Президент Туркия етакчисини Туркий давлатлар ташкилотининг саммити муваффақиятли ўтказилгани ва ушбу нуфузли минтақавий тузилмага раисликни қабул қилиб олгани билан яна бир бор табриклаган. Президентлар Ўзбекистон–Туркия стратегик шериклик ва кўп қиррали ҳамкорлик муносабатларини янада мустаҳкамлашнинг долзарб масалаларини кўриб чиққан.

Қайд этилишича, учрашувда савдо-иқтисодий ва инвестициявий ҳамкорликдаги бугунги юқори суръатларни сақлаб қолиш, товар айирбошлашни кўпайтириш, икки мамлакат етакчи корхона, компания ва банклари кооперациясини кучайтириш муҳим экани таъкидланган. Шунингдек, гуманитар алоқалар фаоллашгани, Ўзбекистон ва Туркияда маданий тадбирлар мунтазам ўтказилаётгани қайд этилган. Бундан ташқари, учрашувда минтақа кун тартибидаги масалалар юзасидан ҳам фикр алмашилган.

Аввалроқ Шавкат Мирзиёев Туркий тилли давлатлар ҳамкорлик кенгашининг 8-саммитида иштирок этгани айтилганди. Шунингдек, Президент саммитда Афғонистондаги вазият ҳақида гапиргани хабар қилинган.