Осиёдаги яна бир давлатда хавфли касаллик тарқалишни бошлади
Японияда парранда гриппининг янги эпидемияси бошлангани маълум қилинди. Бу ҳақда «NHK» хабар берди.
Маълум қилинишича, мамлакатнинг Кагосима префектурасида бир нечта ўлик қушлар топилган. Генетик таҳлиллар уларда парранда гриппининг юқори патогенли «H5» штами мавжудлигини кўрсатган.
Қайд этилишича, фермер хўжалиги атрофидаги 3 километрли ҳудудда товуқ ва тухумларни ташиш учун карантин жорий этилган, шунингдек, жами 143 мингта товуқ йўқ қилиниши режалаштирилган. Касалликнинг тарқалиши Японияда 2021 йилда юз берган иккинчи ҳолат бўлиб, биринчиси шу ҳафта бошида мамлакат шимолидаги Акита префектурасида қайд этилган.
Маълумотларга кўра, парранда гриппининг 2020 йил куздаги ҳамда 2021 йил баҳордаги тарқалиши мамлакат тарихидаги энг йириги бўлган. Оқибатда 50 дан ортиқ фермер хўжалигида 10 миллионга яқин товуқ йўқ қилинган.
Аввалроқ парранда гриппи вирусининг одамдан одамга юқиши мумкинлиги хабар берилган. Шунингдек, россиялик вирусологлар одамлар орасида тарқалган ушбу грипп эпидемиясининг хавфлилик даражасини маълум қилганди.
