Путин коронавирус билан боғлиқ масала юзасидан огоҳлантирди
Россия президенти Владимир Путин дунёда инсон саломатлиги учун янада хавфлироқ бўлган янги коронавирус штамлари пайдо бўлиши мумкинлигидан огоҳлантирди. Бу ҳақда «Известия» хабар берди.
Маълум қилинишича, давлат раҳбари бу бўйича 12 ноябрь куни Янги Зеландия раислигида видеоконференция шаклида ўтказилган Осиё–Тинч океани иқтисодий ҳамкорлиги саммитида гапирган.
Путиннинг сўзларига кўра, янги коронавирус штамлари пайдо бўлиши фонида инфекцияга қарши кураш учун яқин халқаро ҳамкорликни йўлга қўйиш жуда муҳимдир. Россия президентининг фикрича, эмлаш масаласида вакциналарни тарқатиш билан боғлиқ тенгсизликка ва протекционизмдан (давлатнинг товарлар импортини вақтинча чеклаш орқали маҳаллий товарлар ҳамда хизматлар ишлаб чиқаришни қўллаб-қувватлашга қаратилган ташқи савдо сиёсати) воз кечиш керак. Шунингдек, миллий дори воситалари ва сертификатларни ўзаро тан олиш бўйича ишларни якунлаш зарур.
Аввалроқ Путин дунёда юзага келиши мумкин бўлган хавфдан огоҳлантирганди. Шунингдек, хавфсизликни таъминлаш учун нима қилиш кераклигини айтган.
