Қашқадарё вилояти Чироқчи туманида дўстидан ишқий муносабатдаги видеоларини тарқатмаслик учун 1200 доллар талаб қилган фуқаро ушланди. Бу ҳақда «Nasafnews» хабар берди.

Маълум қилинишича, 2021 йил 10 май куни 28 ёшли У.Ж. яқин дўсти 27 ёшли Б.С.га Гули исмли қиз билан яқин муносабатда бўлгани тасвирланган видео борлигини, видеони яқин қариндошларига кўрсатиб, шарманда қилишини, агар 1200 доллар берса, видеони ўчириб ташлашини айтган.

Қайд этилишича, У.Ж. товламачилик йўли билан Б.С.дан 1000 доллар олган вақтда ушланган. 13 октябрь куни Жиноят ишлари бўйича Шаҳрисабз шаҳар судида мазкур масала кўрилган.

Таъкидланишича, суд мажлисида У.Ж. Б.С. билан бирга ўсганини, яқин дўсти эканини, унга ҳазиллашмоқчи бўлганини айтган. Ўз навбатида, жабрланувчи Б.С. ҳам У.Ж. билан дўст эканини айтиб, уни кечиргани, унга нисбатан озодликдан маҳрум қилиш билан боғлиқ бўлмаган жазо тайинлашни сўраган. Суд судланувчи У.Ж.нинг айбига иқрорлиги ва қилмишидан пушаймонлигини, муқаддам судланмаганини, жабрланувчининг даъвоси йўқлигини инобатга олиб, озодликни чеклаш жазоси тайинлаган.

Аввалроқ Сирдарёда тадбиркорни жарима солиш билан қўрқитиб, 5 минг доллар пул талаб қилган мансабдор ушлангани хабар қилинган. Шунингдек, Тошкентда фуқаронинг шахсий маълумотларини тарқатмаслик учун пул талаб қилган аёллар ушлангани маълум қилинган.