Хаббл космик телескопи Хамелеон юлдуз туркумида жойлашган, ўз-ўзидан ёруғлик чиқарувчи юлдузни суратга олди. Бу ҳақда NASA хабар берди.

Маълум қилинишича, суратда газ ва чанг тўплайдиган юлдузнинг иссиқ ҳамда зич ядроси — протоюлдуз акс этган. Протоюлдуз таркибида юлдуз нурини чиқариши учун етарли миқдорда моддалар тўпланиши қайд этилган. Юлдуз нури қоронғуда туманни ёритувчи чироқ нури каби газ ва чанг орқали тарқалади.

Таъкидланишича, Хаббл бу туманликни ёш юлдузлар атрофидаги газ ва чанг дискини излаётганида аниқлаган. Бундай дисклар юлдуз шаклланишидан қолган бўлиб, у охир-оқибат сайёра ҳосил қилиши мумкин.

Эслатиб ўтамиз, аввалроқ олимлар Хаббл телескопи ёрдамида Ердан 400 ёруғлик йили узоқликда жойлашган ва сўнаётган CW Leonis юлдузини суратга олишга муваффақ бўлганди. NASA мазкур юлдузни ўраб турган қобиқнинг ёши камида 69 минг йилни ташкил қилишини очиқлаган.

Аввалроқ Хаббл телескопи ноёб космик объектни суратга олгани ва NASA кинофильм қаҳрамонини ёдга соладиган туманли юлдузлар суратини эълон қилгани айтилган.