Бухоро вилояти Когон шаҳрида 16 ноябрь, сешанба куни икки нафар ишчи тупроқ босиб қолиши оқибатида ҳалок бўлди. Бу ҳақда Фавқулодда вазиятлар вазирлиги матбуот хизмати хабар берди.

Маълум бўлишича, воқеа шаҳарнинг Дўстлик маҳалласи Дўстлик кўчасида содир бўлган. Унда «61-Автокорхона» масъулияти чекланган жамияти томонидан оқова сув қувурларини ётқизиш мақсадида ер 5–6 метр чуқурлик ва 3 метр оралиқда кавланган. 1000 миллиметрли сув қувурлари ётқизилаётган вақтда чуқурнинг чап томони ўпирилиб, икки нафар ишчини тупроқ ва қум босиб қолган.

Қайд этилишича, вилоят Фавқулодда вазиятлар бошқармаси қутқарувчилари томонидан воқеа жойида олиб борилган тезкор қидирув ишлари натижасида икки нафар фуқаронинг жасади тупроқ остидан олиб чиқилган. Воқеа жойига Фавқулодда вазиятлар бошқармаси, Ички ишлар бошқармаси, Соғлиқни сақлаш бошқармаси ва прокуратура раҳбарияти ва тезкор-тергов гуруҳи етиб келган. Шунингдек, мазкур ҳодиса юзасидан дастлабки терговолди суриштирув ишлари бошланган.

Аввалроқ Қорақалпоғистонда 3 киши қум босиб қолиб, ҳалок бўлгани юзасидан қўшимча маълумот берилганди. Шунингдек, Андижонда хандақ қазиётган эркак қум остида қолиб кетгани айтилган.