Россияда қурилиш компанияларидан бирининг раҳбарига қурол билан ҳужум қилган ўзбекистонлик эркак қўлга олинди. Бу ҳақда ҳуқуқ-тартибот органларидаги манбасига таяниб, Москва шаҳар ахборот агентлиги хабар берди.

Маълум қилинишича, ҳодиса 2021 йил 7 сентябрь куни пойтахтнинг Пресненский туманида содир бўлган. Шу куни Тошкент вақти билан 20:00 атрофида 2 нафар номаълум шахс қурилиш компанияларидан бирининг 39 ёшли бош директори юзига газ баллончаси орқали суюқлик сепиб, тўппончага ўхшаш нарса билан қўрқитган. Шундан сўнг унинг сумкасидан 400 минг рублни олиб кетмоқчи бўлган. Аммо бу ишни уддалай олмай, номаълум томонга яширинган.

Таъкидланишича, ҳужум пайтида жиноятчилар тадбиркорнинг бош қисмига бир нечта зарба берган. Ҳужум иштирокчиси деб тахмин қилинганлардан бири 6 ноябрь куни кечқурун «Ленинградский» вокзалида қўлга олинган бўлиб, у 30 ёшли Ўзбекистон фуқароси бўлиб чиққан.

Қайд этилишича, ўзбекистонлик эркакка нисбатан Россия Жиноят кодексининг 162-моддаси 3-қисми билан (Тунаш) жиноят иши қўзғатилган. Сўроқ пайтида судланувчи айбини тан олган.

Аввалроқ Россияда давлатлараро қидирувдаги 55 ёшли ўзбекистонлик аёл ушлангани ва Россияда ўсмирни уриб, унинг кўз шох пардасига зарар етказган ўзбекистонлик йигит қўлга олингани маълум қилинган.